អង់គ្លេស៖ ការត្រឡប់មកដល់ទឹកដីអង់គ្លេសសាជាថ្មីម្តងទៀតរបស់ខ្សែប្រយុទ្ធ Romelu Lukaku និងត្រៀមរួចរាល់សម្រាប់ការបង្ហាញខ្លួននាចុងសប្តាហ៍នេះ ក្នុងជំនួបប្រចាំទីក្រុងឡុងដ៍ ឬ London Derby ទល់នឹងក្រុមកាំភ្លើងធំ Arsenal។ នេះបើតាមការលើកឡើងរបស់លោក Thomas Tuchel។

គួរឱ្យដឹងថា Lukaku ដែលផ្ទេរមកកាន់ Chelsea ពី Inter Milan ក្នុងតម្លៃ ៩៧,៥លានផោនកាលពីពេលថ្មីៗនេះ មិនបានបង្ហាញខ្លួនក្នុងជំនួបដែលតោខៀវ Chelsea យកឈ្នះ Crystal Palace ក្នុងលទ្ធផល ៣-០ នាថ្ងៃបើកឆាក Premier League ឡើយ។

គួរឱ្យដឹងថា Lukaku ដែលបានចាកចេញពី Chelsea តាំងពី ៧ ឆ្នាំមុន បានបន្តដំណើររបស់គេក្នុងអាជីពបាល់ទាត់ជាមួយ Everton, Manchester United និងចុងក្រោយផ្ទេរទៅកាន់ Inter Milan និងជួយឱ្យ Inter Milan ឈ្នះពាន Serie A លើកដំបូងក្នុងមួយទស្សវត្សចុងក្រោយ។

ក្រៅតែពីវត្តមានរបស់ Lukaku លោក Thomas Tuchel ក៏បានបញ្ជាក់ពីវត្តមានឡើងវិញរបស់ខ្សែបម្រើបារាំង N’golo Kante ដែលទើបជាសះស្បើយពីរបួសក-ជើង ប៉ុន្តែ Ruben Loftus Cheek ត្រូវអវត្តមានពីការប្រកួតដ៏ធំនេះ ក្រោយពីការធ្វើតេស្តវិជ្ជមានកូវីដ-១៩ កាលពីពេលថ្មីៗ។

ក្រុមជើងឯក Champions League ២០២១ តោខៀវ Chelsea នឹងត្រូវធ្វើដំណើរទៅកាន់ទឹកដី Emirate Stadium របស់ Arsenal នាថ្ងៃអាទិត្យ ទី២២ ខែសីហាខាងមុខនេះ វេលាម៉ោង ១០:៣០នាទីយប់។ Chelsea បើករដូវកាលថ្មី ឈ្នះ Crystal Palace ៣-០ នៅទឹកដី Stamford Bridge ខណៈ Arsenal បើករដូវកាលថ្មីចាញ់ក្រុមមកពីលីគ Championship, Brentford ដោយលទ្ធផល ២-០៕